Minekashish tshika ishpanuat mitshiminu.
Mishta-minu-tshishikashu, natuapamakanuat pineshuat, utshishtuna ui mishkakanua.
Eukuannu aitipanat nananat nimushuminanat.
Mukᵘ ipanat uinuau, aishkat apu tshika ut tshissinuapamikut innu utauassima, aianishkat tshe petuteniti.
Tshipakassiunnan kie tshimeshkanaminan tshinashatenan itakanuat auassat.
Tanite mitshetuau animiu, mitshetuau peikussu.
– Ne ishpimit ka tat, Ka Tipenitak eukuan tshe uitshitakᵘ, eka ui uni-tshissi, nitikuti nana nukum.
– Takuan nitipenitamun nutshimit, eka ui metuatshe, nitikuti nimushum.
Nin, nitati mashten ka uapamak: « Tshe nakatamuin tshitshissenitamun, nika shaputuepan nin tshitatusseun. »
